Komitə sədri deputatların maaşının artdığını təsdiqlədi: "Böyük qayğıdır"

08.03.2019 15:49
107
Komitə sədri deputatların maaşının artdığını təsdiqlədi: "Böyük qayğıdır"

Milli Məclisin Elm və təhsil komitəsinin sədri, Azərbaycan Milli Elmlər Akademiyasının (AMEA) vitse-prezidenti, akademik İsa Həbibbəyli deputatların maaşının artırılmasını təsdiqləyib.


Ekspress.az xəbər verir ki, İsa Həbibbəyli "Yeni Müsavat”a açıqlamasında deputatların maaş artımını belə şərh edib:


- Maaşınız artıb, deyirlər. Təbrik etmək olarmı?

- Minnətdarlığımızı bildiririk.

- Deyəsən, komitə sədri kimi maaşınız 6 min manatdan çox olacaq, eləmi?

- İndi detalları danışmaq doğru deyil. Maaşımız artırılıb, biz bunu dövlətimizin böyük qayğısı hesab edirik və minnətdarlığımızı bildiririk. Sağ olun...


Qeyd edək ki, "mia.az"ın yaydığı məlumata görə, artıq yanvar ayının 1-dən Azərbaycan parlamentinin deputatları yeni ilə yeni və yüksək artımla başlayıblar. Bu barədə adının çəkilməsini istəməyən deputat köməkçilərindən biri məlumat verib.


Onun sözlərinə görə, Milli Məclisin xərclər smetası üzrə qəbul edilmiş 10 787 420 manat həcmində mövcud əmək haqqı fonduna 2019-cu ilin Dövlət büdcəsindən 11 100 000 manat da əlavə olunub.


Bundan sonra MM üzvləri yanvar ayının 1-dən hər ay ümumilikdə aşağıdakı məbləğdə faktiki vəsait alırlar:


1. Parlamentin sədri: 7424 manat (əvvəl - 3 712 manat)

2. Sədrin birinci müavini: 6680 manat (əvvəl - 3 340 manat)

3. Sədrin müavini: 6308 manat (əvvəl - 3154 manat)

4. Komitə sədri: 5940 manat (əvvəl - 2970 manat)

5. Komitə sədrinin müavini: 5568 manat (əvvəl - 2 784 manat)

6. Sıravi deputat: 5196 manat (əvvəl - 2 598 manat)


Məlumata görə, yanvar ayının 1-dən deputatlarla yanaşı, Milli Məclisin Aparat işçilərinin maaşı da təxminən iki dəfə qalxıb: "Təəssüf ki, bu cür yüksək artımlar deputat köməkçilərinə, MM-in ekspertlərinə şamil olunmadı. Halbuki, bu gün deputat köməkçiləri MM-in aparatına toplanmış, ancaq demək olar ki, gün keçirməklə məşğul olan məmur balalarından çox əziyyət çəkir, işləyirlər. Əgər o məmur balaları MM-ə karyera kimi baxırsa, biz iş yeri kimi baxırıq. Onlardan fərqli olaraq, deputat köməkçiləri həm yerlərdə seçicilərlə görüşür, problemlərini araşdırır, həm də qanunvericilik məsələləri ilə məşğul olurlar. Yəni əlavə o qədər xərclərimiz çıxır ki, bu da aldığımız 800 manat civarındakı maaşa uyğun deyil".

Məlumata görə, problemlə bağlı Milli Məclisin Maliyyə idarəsi ilə İşlər idarəsinin müdiri Firudin Hacıyevə də müraciət olunub. Lakin bu müraciətlər faydasız olub: "Nəticədə deputat köməkçiləri, ekspertlər, sürücülər və xadimələr bu artımdan kənarda qalıblar".


Onu da qeyd edək ki, deputatların maaşının artım xəbərini Milli Məclisin komitə sədri Hadi Rəcəbli hansısa səbəbdən təkzib etmişdi. Digər deputatlar isə bu barədə mətbuata açıqlama vermək istəməyiblər.


İndi isə İsa Həbibbəylinin bu açıqlamasından məlum oldu ki, deputatların maaşı həqiqətən də artıb.


  • SON XƏBƏR
  • TREND