Dövlət Neft Fondu 11 milyard manatdan çox gəlir əldə edib


02.08.2019 10:12
208
Dövlət Neft Fondu 11 milyard manatdan çox gəlir əldə edib

Azərbaycan Respublikası Dövlət Neft Fondu (ARDNF) bildirir ki, 2019-cu ilin yanvar-iyun ayları ərzində ARDNF-nin büdcə gəlirləri 10 milyard 698,3 milyon manat, büdcə xərcləri isə 4 milyard 499,4 milyon manat təşkil etmişdir.

 

6 AYDA GƏLİRLƏRİ 11 MİLYARD 211,4 MİLYON MANAT TƏŞKİL EDİB


Fonddan daxil olmuş məlumatda bildirilir ki, 2019-cu ilin yanvar-iyun ayları ərzində ARDNF-nin neft və qaz sazişlərinin həyata keçirilməsi ilə bağlı gəlirləri 8 milyard 557,1 milyon manat, o cümlədən mənfəət neftinin və qazın satışından 7 milyard 780,7 milyon manat, bonus ödənişləri 766,4 milyon manat, tranzit gəlirləri 8,9 milyon manat, akrhesabı ödənişlər 1,1 milyon manat təşkil etmişdir.

 

Hesabat dövrü ərzində ARDNF-nin vəsaitinin idarə olunmasından əldə edilən gəlirlər 2 milyard 141,2 milyon manata bərabər olmuşdur.

 

Valyuta məzənnələrinin dəyişməsindən yaranan fərq ilə bağlı ARDNF-nin büdcədənkənar gəlirləri 513,1 milyon manat təşkil etmişdir.

 

Hesabat dövrü ərzində ARDNF-nin 2019-cu il büdcəsinin icrası çərçivəsində 4 milyard 413,0 milyon manat vəsait dövlət büdcəsinə transfert edilmişdir.

 

Qaçqın və məcburi köçkün ailələrinin məskunlaşdırılması və sosial-məişət vəziyyətinin yaxşılaşdırılması üzrə tədbirlərin həyata keçirilməsinə 74,9 milyon manat vəsait ayrılmışdır. 2019-cu ilin yanvar-iyun ayları ərzində ARDNF-nin idarə edilməsi ilə bağlı xərcləri 11,5 milyon manat təşkil etmişdir.

 

AKTİVLƏRİ 10%-DƏN ÇOX ARTIB

 

2019-cu il iyunun 30-a ARDNF-nin aktivləri 2019-cu ilin əvvəlinə (38 milyard 515,2 milyon ABŞ dolları) nisbətən 10,25% artaraq 42 milyard 463,7 milyon ABŞ dolları təşkil etmişdir.

 

Aktivlərin artımı ARDNF-nin büdcə gəlirləri, o cümlədən vəsaitlərin idarə edilməsindən əldə edilən gəlirlər hesabına olmuşdur. Müvafiq dövr ərzində ən yüksək gəlirlilik səhm alt portfelində müşahidə olunmaqla investisiya portfelinin hər bir tərkib aktiv növü üzrə müsbət gəlirlilik qeydə alınmışdır. Belə ki, səhm alt portfeli üzrə ötən ilki mənfi gəlirliliyə baxmayaraq (-6,6%) 2019-cu ilin ilk 6 ayı ərzində müvafiq göstərici 13,1% təşkil etmişdir. (marja)


Ekspress.az